關於我們

“香港購物咁方便,網購邊會有得做啊?”

“上網買野咁麻煩,無人會用架啦…”

聽過依類型說話無數次,但係明明依樣野喺全世界好多發達嘅城市都行得通,邊有理由香港完全唔需要?得唔得唔應該係人地把口講出嚟,而應該係由個市場同我哋講。

就係抱住依個想法,我哋嘅團隊喺2013年開始積極籌備,並喺同年成立全香港第一個專注於Hobby類產品嘅網上零售店—HEETNet.com。

喺網店發展初期,我哋幾個乳臭未乾嘅小伙子,對產品知識認識唔多、唔了解送貨需要、唔識網站開發,我哋一邊做、一邊錯、一邊學,一路走來組成依家嘅電商團隊。

踏入2018年,經歷咗幾年,累積咗一定嘅經驗之後,好慶幸市場對我哋團隊所付出嘅努力回應係正面嘅,我哋好高興終於能夠為大家帶來一個全新嘅自己—HobbyDigi.com電購網!以一個全新面貌同大家見面,繼續為大家搜羅更多最新、最實惠嘅產品,務求為各位帶來更優質嘅網上購物體驗。

喺新嘅網站,我哋會繼續學習,力求進步,將購物變成輕而易舉嘅事,令HobbyDigi.com電購網成為每一位客人嘅首選!